Maanta magaalada Muqdisho ayaa waxaa aas-Qaran loogu sameeyay Seddax Gudoomiye degmo labo Agaasime iyo Sedax lataliye sare oo dhamaan ahaa mas,uuliyiintii maamulka Gobolka Banaadir ee ku nafwaysay qaraxii shalay galab ka dhacay xarunta Maamulka Gobolka Banaadir waxaana ka qeyb galay aaskaas Qaran wasiiro, Xildhibaano,Saraakiil, ehel iyo saaxiibada marxuumiinta geeriyootay waxaana lagu Aasay qabuuraha Isbitaalka Madiina ee Magaalada Muqdisho.

Markii aaska Qaran uu soo idlaaday ayaa waxaa Saxaafadda la hadlay Agaasimaha Warbaahinta ee Madaxtooyada Soomaaliya Cabdinuur Maxamed Axmed wuxuu marka hore ka tacsiyadeeyay geeridii mas,uuliyiinta aaska Qaran ay usameeyeen ka dibna wuxuu ka hadlay wixii shalay galab ka dhacay Gobolka Banaadir.

Agaasime Cabdinuur ayaa sheegay in falkaas uu ahaa fal wuxuushnimo islamarkaana ay fuliyeen Khayr laawiyaal sidoo kale wuxuu sheegay Agaasime Cabdinuur Maxamed Axmed in falkaas Laamaha amniga ay ku hayaan baaritaan adag cida fudadaysay,sida lagu geliyay qaraxa gudaha xarunta iyo hoolka shirarka ee xarunta Gobolka Banaadir iyadoo si dhamaystiran loo baarayo Kaamirooyinka ku xiran xarunta iyo baaritaan cilmi ku dhisan oo lagu samaynayo guud ahaan sida ku suurta gashay in qarax uu ka dhaco xarunta oo amaankeeda oo loo waardiyo.

Agaasimaha Madaxtooyada qeybta Warbaahinta Cabdinuur Maxamed Axmed ayaa ugu baaqay bahda Saxaafadda Soomaaliyeed inay ka gaabsadaan baahinta wararka ku saabsan khasaarihii ka dhashay weerarka bahalnimada ah si aanay ugu farxin cadowga sida uu ka dhawaajiyay Agaasimaha Warfaafinta ee Madaxtooyada Soomaaliya.

“Weerarkan ma,ahan kaliya mid lagu soo qaaday xafiis dowladeed ee waa mid lagu qaaday guud ahaan Umadda Soomaaliyeed si loo baabi’iyo sharafta iyo jiritaanka Ummada Soomaaliyeed taasna waa inay nagu kaliftaa in maanta oo kale aan meel iska dhigno kala aragti duwanaanta ee dhexdeena ah oo aan muujinaa midnimo iyo isku duubni islamarkaana hal meelna aan uga soo wada jeesanaa argagixisada hadaf kooda uu yahay in si aan kala sooc lahayn oo wuxuushnimo ah ummadda u laayaan iyagoo caadeystay inay bartilmaameed sadaan shaqsiyaadka bulshada indhaha u ah”ayuu yiri Agaasimaha Madaxtooyada qeybta Warbaahinta Cabdinuur Maxamed Axmed.

Agaasime Cabdinuur oo umahad celiyay shacabka Soomaaliyeed ee ku nool magaalada Muqdisho sida qiimaha leh ee ay ula shaqeeyeen laamaha amniga Muqdisho ayaa ku booriyay inay labajibaaraan wada shaqaynta Ciidamada kala duwan ee amniga qaabilsan si looga adkaado argagixisada gumaadaysa shacabka iyo haldoorka Soomaaliyeed.

Xaafada Siigaale ee degmada Hodan ayaa caawa maqribkii ka dib waxaa lagu dilay mid ka mid ahaa dhalinyarada ku nooleed ka degmadaas waxaana dilkiisa ka dambeeyay koox Bastoolado ku hubaysan sida ay sheegeen qaar ka mid ah dhalinyarada xaafadaas dilka uu ka dhacay oo la hadlay Wargayska Tusmotimes.

Kooxda dishay ninkaas dhalinyarada ah ayaa ka baxsaday goobta ay wax ku dileen ilaa haddana lama oga sababta ay udileen marxuumka iyo kooxda ay ka tirsan yihiin.

Goobta dilka uu ka dhacay ayaa waxaa la sheegay in daqiiqado ka dib ay gaareen Ciidamada amniga ee Muqdisho iyagoo howlgal ka fuliyay xaafada Siigaale ee Degmada Hodan sida aan warka ku helnay.

Ninkan dhalinyarada ah oo ilaa hadda aan lagaranin magaciisa iyo shaqadiisa waxay ahayd ayaa waxaa wali ka hadlin laamaha amniga ee dowladda federaalka Soomaaliya.