MINNESOTA – Waxaa magaaladda Minneapolis si habsami leh uga socda qabanqaabadda munaasabad lagu maamuusayo sannad guuradii tobnaad ee ka soo wareegtay aas-aaska madxafka hiddaha iyo dhaqanka Soomaalida ee Minnesota. Munaasabadan oo sannadka la qabanayo labo maalmood oo isku xiga Sabti October 21, iyo Axad October 22, 2023 ayaa lagu qabanayaa magaaladda Burnsville ee gobolka Minnesota.

Madxafka hiddaha iyo dhaqanka Soomaalida ee Minnesota ayaa sannad walba qabta munaasab balaaran oo lagu soo bandhigo sooyalka taariikhda Soomaalida, agabka iyo ciyaaraha hiddaha iyo dhaqanka Soomaalida. Sidoo kale munaasabaddan ayaa abaal-marin lagu gudoonsiinayaa qaar kamid ah haldoorka bulshadda.

Waxaad akhbaar dheeraad ah oo ay kamid yihiin tigidhadda lagu galayo munaasabadda aad ka heli kartaa bogga madxafka hiddaha iyo dhaqanka Soomaalida ee Minnesota : http://www.somalimuseum.org/10th-anniversary.html

MINNEAPOLIS – Ubax Cali oo kamid ah Soomaalida deggen gobolka Minnesota ayaa noqotay wariye ka tirsan talefishinka WCCO ee ku yaala magaaladda Minneapolis ee gobolka Minnesota. Ubax Cali ayaa taariikh cusub ka dhigtay gobolka Minnesota oo ay deggen yihiin Soomaalida tiro ahaan ugu baddan dalka Mareykanka, kaddib markii ay ka mid noqotay shaqaalaha talefishinka WCCO iyadda oo noqonaysa wariyihii Soomaaliyeed ee ugu horeeyay ee kamid noqda warbaahinta talefishinka maxaliga ah.

Ubax Cali ayaa horaantii bishii April, 2023 sheegtay in ay ka tagtay shaqadii wariyenimo ee ay ka haysay talefishinka TMJ4 oo ku yaala magaaladda Milwaukee ee gobloka Wisconsin ee dalka Mareykanka. Ubah Cali ayaa bogga ay ku leedahay Facebook ku soo qortay in ay wariye ka noqonayso, shaqana ka bilowday talefishinka WCCO oo ay sannadkii 2017-kii ka ahayd ardayda ka shaqeeya talefishinka WCCO.

Wariye Ubax Cali ayaa wareysi ay siisay Cathy Wurzer oo ka tirsan warbaahinta MPR News ka hadashay in ay riyadii ay lahayd u rumowday, kana miro dhalisay hamigii ay ka lahayd saxaafadda, ayna maant ku faraxsantahay in ay ku shaqaynayso xifrad ay jeceshahay, iyadda oo weliba cod u noqonaysa bulshadda ay ka soo jeedo iyo dad baddan oo aan ka muuqanin warbaahinta maxaliga ah.

Xigashadda sawiradda: Ubah Ali

Xulka qaranka Soomaaliya ayaa bar-baro kala kulmay Xulka qaranka Eritrea iyagoo ciyaaray kulankii 4-aad ee tartanka bariga iyo bartamaha Afrika ee Cecafa Senior Challenge Cup ee ka socda dalka Uganda.

Kulankan ayaa ahaa mid adag oo ay labada xulba soo bandhigeen qaab ciyaareed fiican oo dhan walba isaga dheeli tiranaa ciyaartooda hadii ay tahay dhanka weerarka iyo daafaca.

Gool hayaha xulka Soomaaliya ayaa dhawr mar badbaadiyay in Gool laga dhaliyo Xulka Soomaaliya ka dib markii ciyaar yahanada Eritrea isku dayeen inay Goolal ay ka dhaliyaan xulka Soomaaliya halka Xulka Soomaaliya sidoo kale ay heleen fursado cajiib ah balse iyana Gool hayaha xulka Eritrea uu ka badbaadiyay in Gool ay ka dhaliyaan Xulka Soomaaliya.

Intii ciyaarta ay socotay ayaa waxaa garoonka ciyaarta ka dhacaysay ku sugnaa bulshada Soomaaliyeed ee degan Magaalada Kampala ee dalka Uganda iyagoo mar walba dhiiri gelinayay ciyaartoyda xulka qaranka Soomaaliya.

Ugu dambayn kulanka ayaa ku dhamaaday bar-baro ama 0-0 waxana xulka Eritrea Xaqiijiyeen kaalinta 2-aad ee ciyaarta.

Xulka qaranka Soomaaliya ayaa dhawaan 1-0 kaga soo badiyay Xulka Burundi waxayna haystaan 4 dhibcood.

Dadka ka faalooda arimaha Sport-ka ayaa waxay sheegeen in xulka Soomaliya hadda ay marayaan markii ugu fiicneed abid inta la xasuusto.

Xulka Soomaaliya ayaa waxay ku jiraan Group A Ciyaarta bariga iyo bartamaha Africa waxayna iskula jiraan Eritrea oo hadda barbaro isla dhaafiwaayeen Uganda,Djabuuti iyo Burundi.

Hasa ahaatee xulka Soomaaliya ayaa ka haray tartanka ciyaaraha ee bariga iyo bartamaha Africa ka dib markii laba jeer barbaro ay galeen midna laga soo badiyay midna ay badiyeen haddii ay ka badin lahaayeen xulka Eritrea waxay sii wadan lahaayeen ciyaarta waxayna tegi lahaayeen booska labaad ee ciyaarya waxayna ku hareen 4 dhibcood.