Dhalinyaro loo haysto dilkii Ganacsade Cukaash oo dil lagu xukumay

Maxkamadda Ciidamada qalabka sida ee Maamulka Puntland ayaa maanta xukun dil toogasho ah ku riday afar nin oo dhalinyaro ah ka dib markii lagu soo eedeeyey in ay ka dambeeyeen dilkii Ganacsade Salaad Cabdi Cukaash oo todobaadkii hore lagu dilay Magaalada Boosaaso.

Dhalinyaradan maanta xukunka dilka toogashada ah lagu riday ayaa dhowaan waxaa soo xiray Ciidamada amaanka Maamulka Boosaaso kagadaal howlgal ay ka sameeyeen xaafadaha Magaalada Boosaaso.

Wiilasha dilka lagu xukumay ayaa magacyadooda waxay kala yihiin.

1-Cabdifitaax Axmed Xassan

2-Daahir Dalmar Saalax

3-Farxaan Siciid Yuusuf

4-Maxamed Cabdiraxmaan Maxamuud.

Garsooraha Maxkamadda ayaa dil toogasho ah ku xukumay Dhalinyaradan kadib markii lagu helay dilka ganacsade Salaad Cabdi Cukaash sida uu sheegay garsooraha Maxkamada.

Garsooraha ayaa wuxuu intaas ku daray in rasaasta ku dhacday marxuum Salaad Cabdi Cukaash ay iyagu rideen ayna doonayeen in ay dhac mobile u geystaan shakhsiga ay dileen

Garsooraha ayaa ugu dambeyntii gacan ku dhiigleyaasha xukunka uu dhacay ku wargeliyay in ay haystaan 30 cisho oo ay rafcaan kaga qaadan karaan xukunka dilka ah ee maanta ku dhacay.