Gabar kufsi iyo dil loogu geystay Gedo

Deegaan 10 KM u jira Degmadda Garbahaarey ee xarunta Gobolka Gedo ayaa 25 kii bishan Febraayo waxaa ka dhacay fal aad u naxdin badan, aadna u fool xun, kadib markii haweenay lagu magacaabi jiray Xaliimo Cali Saalax la iskugu daray kufsi iyo dil.

Arrintan ayaa waxaa sameeyey Muxumad Cali Mahad oo qaraabo dhaw ay ahaayeen Marxuumad Xaliimo Cali Saalax. Markii Muxamed uu isku dayey in uu faraxumeeyo haweenaydaas ka dibna sidaas dagaal uu ku dhexmaray asaga iyo Xaliimo Cali Saalax oo ahayd inaadeertiis.

Ninkan dilay Xaliimo Cali Saalax ee lagu magacaabo Muxumad Cali Mahad ayaa waxaa naloo sheegay in uu wakiil ka ahaa nin kale oo Marxuumad Xaliimo Cali Saalax ka dhexeysay arrimo la xariira shukaansi ama wada sheekaysi xodxodasho ah.

Muxumad Cali Mahad ayaa waxaa loo wakiisha in Xaliimo uu ka soo kaxeeyo dhulka Miyiga ah ee Garbahaarey u jira 10 KM kadibna uu ku wareejiyo ninkii sheeko wadaaga ay ahaayeen Xaliimo oo ku sugan Garbahaarey.

Ninkan dilay Xaliimo Cali Saalax oo gurigeeda ka soo ka xeeyey soona waday Masaafo dheer ayaa waxaa dhacday in uu damcay oo uu go’aansaday in uu u galmoodo gabadhii ina adeerka ay ahaayeen, saaxiibkiisna uu u dirsaday.

Kadibna is fahanwaa iyo dagaal yimid awgeed ayuu Muxumad ku ceejiyey Xijaabkii ay xirneed gabadhu,  sidaasna ay ku geeriyootay Xaliimo Cali Saalax.

Ninkan dilay Xaliimo Cali Saalax ee lagu magacaabo Muxumad Cali Mahad ayaa waxaa kaloo la sheegay in Maydka Gabadhaas gacantiisa uu ku dilay uu isticmaalay iyada oo mayd ah, waa sida ay inoo xaqiijiyeen ehelada gabadha.

Muxumad Cali Mahad ayaa markii uu ku kacay falkaas foosha xun Bini,aadanimadana ka baxsan waxaa gacanta ku dhigay Al Shabaab oo meesha ay wax ka dhaceen Maamula, waxaana dhacday in markii dambe ninkan qaab farsamaysan uu uga soo baxsaday ama fakaday gacanta Al Shabaab.

Intii uu u xirnaa Al Shabaab ayaa waxay ku xukumeen dil toogasho ah, markii uu ka soo fakaday Al Shabaab ayaa wuxuu soo galay Magaalada Garbahaarey oo markii horaba uu ka tagay markii gabadhan uu doonayey.

Muxumad Cali Mahad oo si dhuumaalaysi ah ku soo galay Garbahaarey ayaa waxaa ka war helay Ciidanka Booliska Garbahaarey howlgal ay ka sameeyeen xaafadaha Magaaladaas ayey markii dambe u suurta gashay in ninkan dambiilaha ah ay soo qabtaan.

Ninkan dambiga dilka ah gaystay ayaa hadda wuxuu ku xiran yahay Saldhiga Ciidanka Booliska Garbahaarey ee xarunta Gobolka Gedo.

Muxumad Cali Mahad oo falkan foosha xun geystay ayaa ah nin Xaas iyo Caruur leh, iyada oo hadda xaaskiisa ay leedahay uur dhowr bilood ah, wuxuuna horay u soo maray labo guur.

Mid kamid ah xaasaska uu soo guursaday Muxumad Cali Mahad ayaa waxaa naloo sheegay in Xaliimo Cali Saalax oo uu dilay ay eedo u ahayd, ilmihiisana waalid ugu aadan tahay.

Ninkan ayaa da,diisa waxaa la sheegay in ay tahay 40 jir halka gabadha uu dilay maydkeedana uu kufsaday ay jirtay 25 sanno.

Taliska Ciidanka amaanka Garbahaarey ayaa iyaga iyo Culimada Magaaladaas waxay ku xukumeen dil toogasho ah Muxumad Cali Mahad waxaana lagu waday in maanta abaaro 08:00AM,Subaxnimo xukunkii dilka qisaaskii Xaliimo Cali Saalax lagu fuliyo ninkaas.

War si hoose uu uhelay Wargayska Tusmotimes xafiiska Muqdisho ayaa sheegaya xukunkii dilka qisaaska ahaa ee la doonayey in lagu fuliyo Muxumad Cali Mahad uu dib udhacay.

Mid la mid ah midda lagula kacay Marxuumad Xaliimo Cali Saalax ayaa waxay ka dhacday dhawaan Magaalada Gaalkacyo ee xarunta Gobolka Mudug waxaana loo gaystay Gabar 12 sanno jir ah oo lagu magacaabi jiray Caasho ilyaas Aadan iyadoo hadda lagu howlanyahay soo qabashada raggii Falkaas wuxuushnimada ah kula kacay Caasho ilyaas Aadan ee aan qaangaarin intii ay faraxumeeyeen ka dibna dilay.