Wararka Soomaalida
Koobka Todobaadka Xoriyadda Soomaaliya ee Minnesota oo si qurxoon ku dhamaaday
Waxaa magaaladda Minneapolis ee gobolka Minnesota lagu soo gebagabeeyay tartankii kubadda cagta ee lagu xusayey xoriyadda Soomaaliya.
Koobkan kubadda cagta ee loogu magacdaray Todobaadka Soomaalida iyo Minneapolis (MSP Somali Week) ayaa waxaa ka qayb galay 8-deed kooxood oo ka kala socday saddex gobol oo kamid ah dalka Mareykanka oo ay kamid yihiin Georgia, Ohio iyo Minnesota.
Tartankan oo ahaa mid si qurxoon loo soo agaasimay, dad weynihii u soo daawasho tegay iyo ciyaartooydii ka qayb qaatayna ay aad u bogaadiyeen, ayaa waxaa soo qaban-qaabiyey tababare Adam Ugas.
Ciyaartii kama dambeysta ahayd ee koobka todobaadka xoriyadda Soomaaliya ayaa waxaa isku soo baxay labadda kooxood ee Qaranka iyo Section 0ne. Waxaa koobka hantay oo ay guushu ku raacday 5 -2 kooxda Section One. Labadda kooxood ee iyagu nasiibka u yeeshay in ay ku kulmaan ciyaarta finalka ah ayaa soo bandhigay ciyaar aad u qurxoon oo aad loola dhacay, balse waxaa awood batay oo ciyaar isku dheeli tiran koobka ku qaaday kooxda Section One iyo macalinkooda Macow.
Koobkan oo ay ka qeybqaateen 8-deed kooxood ayaa waxaa kaalinta koobaad ku guuleysatay kooxda Section One, kaalinta labaad kooxda Qaranka, Goolhaya ugu wanaagsan Mahad oo u ciyaara kooxda Section One, Ciyaartooygii ugu goolasha badnaa Abdikadir Qasaaye oo u ciyaara kooxda Qaranka, ciyaartooygii ugu wanaagsanaa ama MVP-ga tartanka Abdulkadir Aideed oo u ciyaara kooxda Section One.
Haddaba markii ay ciyaartii dhamaatay ayaa goobta iyo garoonka lagu qabtay ciyaarta laga bixiyay bilado iyo abaal-marino la gudoonsiiyay kooxdii koobka hanatay iyo ciyaartooydii ugu wanaagsanaa intii uu tartanku socday oo abaal-marino kala duwan la gudoonsiiyay.
Waxaa koobka, biladaha iyo abaal-marintaba bixiyay qaar kamid ah haldoorka iyo hogaamiyeyaasha bahda Isboortiska iyo qaybaha kala duwan ee bulshadda. Waxaa kamid ahaa marti sharaftii iyagu bixiyay koobka iyo biladaha:
Macalinkii Qaranka macalin Muslimiin, Fartun Osman oo ah tababare gabdhaha, horayna u soo ahayd ciyaartoy qaran, Abuukar Hassan oo kamid ahaa ciyaartooydii hore ee Badda iyo Dakada, Laacibiintii hore ee Minishiibiyo Cusman Baaldi iyo Liban Jama (Liibaan Futeey), Abwaan Abdikani Haji October oo horeyna u ahaa ciyaartooyda ugu caansan gobolka Minnesota, ganacsadde Ahmed Jama oo kamid ahaan jiray ciyaartoyda gobolka Minnesota ahna mulkiilaha shirkadda gaadiidka ee Sunlight Logistics iyo wiilka dhallinyaradda ah Ali Talyaani oo isagu kaalinta dhallinyaradda matalayey.
