Ra’iisul wasaaraha oo caawa booqday goobaha lagu caweeyo ee Garowe+sawiro

Ra’iisul Wasaare Xukuumadda Soomaaliya Xasan Cali Khayre ayaa caawa booqday qaar kamid ah goobaha bulshadu Garowe ay ku kulanto xiliga habeenkii ah Ra’iisul wasaaraha wuxuu halkaas kula kulmay qaar ka mid ah shacabkii ku caweynayey goobahaas iyadoo uu ka xog waraystay xaalada amaan iyo midda nololeed ee ka jirta Garowe.

Xasan Cali Khayre oo aan daba yaacaynin Ciidan iyo ilaalo tiro badan ayaa meelihii uu booqday kala kulmay shacabka soo dhaweyn iyo kal gacaylka loo qabo xukuumadda Soomaaliya ee uu wasiirka koobaad uu ka yahay.

Shacabkii uu lakulmay ayaa usheegay Ra’iisul wasaaraha nabadda iyo nolosha wanaagsan ee taala Magaalada Garowe ee xarunta Gobolka Nugaal iyagoo shacabkaas intaas uraaciyey Xasan Cali Khayre inay ubaahan yihiin in Xukuumadiisa Barnaamijyadeeda ay soo gaarsiiso Garowe.

Ra’iisul wasaare Xasan Cali Khayre oo soo maray intabadan faras magaalaha Garowe ayaa bogaadiyey nabad geliyada iyo horumarka wadajirka ah ee ay ka hir geliyeen shacabka iyo Maamulka Puntland Magaalada Garowe oo asaguba ka markaati kacay caawa booqashadiisii bartamaha Garowe ee uu ku soo arkay nabadda iyo horumarka yaala Magaalada.