Wiil Soomaaliyeed oo dhallinyaro ah oo xalay Minneapolis lagu toogtay

Minneapolis – Waxaa saaka subaxii magaalada Minneapolis lagu dilay oo lagu toogtay will Soomaaliyeed oo dhallinyaro ah.

Wiilkan dhallinyarada ah ayaa geeriyooday ka dib markii la toogtay saaka subaxnimadii hore saacadu markii ay ahayd 4:30 subaxnimo.

Wiilkan la dilay oo aan weli magaciisa la sheegin ayaa waxaa lagu dilay ciwaanka ama aaga 2700, 16th Avenue South. Bilayska magaalada Minneapolis  ayaa sheegay in la soo wacay oo loo sheegay is rasaaseyn ka dhacday goobta wiilka lagu toogtay.

Markii ay yimaadeen askartu goobta la isku xabadeeyay, waxay sheegeen in ay u yimaadeen wiilkan dhallinyarada ah oo weli dhaawac ah, isla markaas loo qaaday Xaruunta Caafimaadka ee Hennepin, halkaas oo uu wiilka dhallinyarada ahi ku geeriyooday wax yar kadib.

Bilayska ayaa sheegay in aqoonsiga iyo magaca wiilka ay sii dayn doonto Xafiiska Baadhitaanka Caafimaadka ee Degmadda Hennepin.

Haddaba wiilkan Soomaaliyeed ayaa noqonaya wiilkii saddexaad ee sannadkan 2019 u dhinta toogasho iyo xabad lala beegsaday.

Bilayska magaalada Minneapolis ayaa codsanaya in qof kasta oo macluumaad ku saabsan dilka wiilkan dhallinyarada ah ay soo wacaan taleefanka qolyahay dembiyadda ka hortaga ee CrimeStoppers 1-800-222-8477, waxaad tixraacdaa lambarka 19-138150 oo kayska la xiriira dilkan.