Ganacsade caan ah oo wiil uu dhalay lagu dhaawacay Muqdisho

Ciidanka Booliska dowladda Soomaaliya ayaa caawa isgoyska Dabka ee wadada Maka Al-Mukaramah ku dhaawacay wiil uu dhalay ganacsadaha Soomaaliyeed ee lagu magacaabo Ismaaciil Cabdullaahi Siyaad (Gooni) ahna milkiilaha Hotel Dayax ee Muqdisho.

Wiilkan la dhaawacay ee uu dhalay Ganacsade Ismaaciil Cabdullahi Siyaad Gooni ayaa magaciisa waxaa lagu sheegay Axmed ismaaciil Gooni waxaana markii dhaawaca uu soo gaaray loola cararay Isbitaalka Digfeer oo hadda lagu dabiibayo dhaawicii soo gaaray sida ay sheegayaan wararka aan ka helnay Isbitaalka Digfeer.

Wax tafaasiil dheeri ah ilaa hadda lagama hayo qaabka uu falkan dhaawaca ah uu u dhacay iyo waxa keenay in Ciidamada Booliska ay dhaawacaan ninkaas dhalinyarada ah xili isgoyska Dabka uu marayay waxaana la sheegay in wiilka la dhaawacay dhowaan ka yimid dalka dibadiisa muddooyinkana uu ku sugnaa magaalada Muqdisho.

Falkan dhaawaca ah ee loo gaystay Axmed Ismaaciil Gooni ayaa wuxuu ku soo beegmayaa ka dib markii Dhowaan aabihiis Ismaaciil Candullahi Siyaad Gooni Madaxweynaha dalka Indonesia Joko Widodo Qunsul sharafeed dowladda Indonesia u fadhinaya Soomaaliya gaar ahaan Muqdisho u magacaabay iyadoo Ganacsade Ismaaciil Cabdulaahi Siyaad Gooni uu kamid yahay ganacsatada Soomaaliyeed kuwooda ugu caansan uguna dhaqaalaha wanaagsan Soomaaliya.