Laamaha amniga oo soo qabtay nin Bam gacmeed ku hubaysnaa

Ka dib howlgal caawa Ciidamada amniga Muqdisho ay ka fuliyeen qaar ka mid ah isgoysyada Muqdisho ayaa waxay sheegeen in gacanta ay ku soo dhigeen nin dhalinyara ah oo ku hubaysnaa Bam gacmeed xili uu doonayay inuu Bam gacmeedka uu ku weeraro xarun Ciidamada ay wax ku baaraan.

Ciidamada amniga Muqdisho oo isweer ku qabtay ninkan dhalanyarada ah ayaa ugu dambayn la soo qabtay isagoon wax dhibaato ah gaysan.

Hay’adda Nabad sugida Soomaaliya oo caawa soo bandhigtay ninkaas da’dayar ayaa waxay ku sheegeen inuu ka mid yahay Ururka Al shabaab ka dib howlgal ninkaas lagu soo qabtay sida Hay’adda ay sheegtay.

“Ciidamada Amniga ayaa caawa gacanta kusoo dhigay dhagarqabe katirsan Al shabaab isagoo doonayey inuu Bam-gacmeed ku tuuro Xarun Ciidamada ay ku sugnaayeen waxaana la qabtay isagoo wax khasaara ah u gaysan shacabka iyo Ciidanka waxaana la xisaabtamaya hay’adaha ku shaqada leh ee Soomaaliya”ayaa lagu yiri warkan ka soo baxay hay’adda NISA ee Soomaaliya.

Hay’adda NISA ee Soomaaliya ayaa intabadan soo dhigta sawirada shaqsiyaad ay ku sheegaan inay ka tirsan yihiin kooxda Al shabaab balse magaca qofka masheegaan iyadoo ilaa hadda la ogayn hay’adda waxa ay ka wado ama uqarinayso magacyada shaqsiyaadka ay soo qabtaan.